Penyangkai Kapal Bintulu Deka Nempa Gela Penyangkai Kapal Digital Manggai 2030
KUCHING: Bintulu Port Holdings Berhad ransing ngenegap transformasyen digital nyerumba juluk ati nyadi penyangkai kapal digital manggai taun 2030.
Presiden iya Dato Ruslan Abdul Ghani madah, ba timpuh tiga taun tu, mayuh inisiatif strategik udah dipejalai dikena ngemaru sistem pengawa penyangkai kapal seriris enggau pemansang teknologi global.
Ku iya, inisiatif tumu dipun enggau ngaga sistem ‘smart gate’ ti disikap enggau teknologi nentu lumur rejista perengka pengangkut, lalu nambah penyikar arus trafik ke tama ba penyangkai kapal.
“Maya tu, kami benung masang sistem pengawa penyangkai kapal ke dikena ba Shanghai, nyengkaum di Yangshan Phase 4 ke alai sistem tu ngempung pengawa nengah chara ti komprehensif sereta nyendia chara kereja ti moden agi sereta efisyen ngagai penguna enggau mega raban pengatur,” ku iya maya dirandau media pengudah Lemai Masa Media Penyangkai Kapal Bintulu 2026 ditu, Hari Tiga.
Nambah ke jaku iya, iya madah, Penyangkai Kapal Bintulu bela numbuh sistem marin ungkup ngatur kapal ti sistematik agi kelimpah ngemanah pengawa matau pengelikun nengah masang ‘CCTV’ enggau bekenaka teknologi dron.
“Kami udah bekenaka dron nyengkaum konsep ‘nested drone’, lalu Bintulu Port keterubah ba Malaysia ngena teknologi nya,” ku iya nerang.
Nerang pemansang pemadu baru, iya madah, sistem pengawa penyangkai kapal udah digaga ba Samalaju Industrial Port kenyau September taun dulu lalu disadang tembu ba Penyangkai Kapal Bintulu manggai April taun tu.
Kelimpah ari nya, raban iya diatu ba proses ngemansang teknologi ‘digital twin’ ungkup pengawa penyangkai kapal.
Enti mujur digaga ba timpuh semak tu, Penyangkai Kapal Bintulu bisi pengulih nyadi entara penyangkai kapal ke pemadu tumu di Malaysia ngena teknologi nya.
Ba pekara bukai, iya ti mega Tuai Pegawai Eksekutif Penyangkai Kapal Bintulu Holdings Berhad nerang, Bintulu Port naka tu nadai bepenanggul enggau ekonomi global ti enda tentu nyengkaum isu chukai Amerika Syarikat (AS), ngira dagang penyangkai kapal nya enda mayuh bepanggai enggau makit AS.
Taja pia ku iya, dagang besai enggau China, Jepun sereta sekeda menua Eropah ke alai produk ke diatur lebih agi ba Samalaju Industrial Port mayuh agi dieksport ngagai makit Asia Timur baka China enggau Jepun.
“Enti menua nya bepenanggul laban chukai AS, nyangka kami mega bela ngasai. Tang naka setaun tu, kami nadai meda penanggul ti signifikan ngagai pengawa penyangkai kapal,” ku iya baru. -EDISI UKAS