KUCHING: Inisiatif kreatif Bintulu Port Holding Berhad ngias perau tambang Sungai Sarawak ngena pantun ti berambaika jaku penyerakup enggau lalau, ukai semina medium pengangkut tang nyadi platform mai lanting bansa.
Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah madahka, inisiatif ti dipejalaika Bintulu Port nya chunto sebuah kompeni korporat ukai semina mantu komuniti tang mega nyaga budaya enggau identiti bansa.
"Inisiatif Bintulu Port tu amat unik tauka nyelai laban nya ukai semina meri pemeri tauka bantu aja, tang ditangkan enggau asil kereja kreatif nengah pengawa ngias 16 buah atap perau tambang ba Sungai Sarawak ngena leka pantun berambaika jaku penyerakup enggau lalau.
"Uji perati, lebuh perau ba Sungai Sarawak, ukai semina nya nyadi medium pengangkut temuai, tang mega sebuah platform mindah ti mai lanting bansa.
"Bala raban nembiak, temuai ari dalam enggau luar menua sereta raban bansa ulih meda, macha, meretika enggau meri basa ti besai ngagai pantun ba awak ti lantang tang penuh enggau nilai tauka reti," ku iya.
Abdul Karim madahka pekara nya dalam teks jaku iya ti dibacha Penasihat Old Kuching Smart Heritage (OKSHE) Datu Dr Sabariah Putit ngarika iya bejadi pengerami Siri Pantun Bintulu Port Perahu Penambang Sungai Sarawak, ti diatur ba English Teas House ditu, sehari tu.
"Aku arap bendar, asil pengawa ti baka tu deka meri empas ti dalam laban lanting tauka pesaka ti ditanka sehari tu deka nyadi reta ti chukup berega ungkup rebak dudi ila," ku Abdul karim.
Abdul Karim madahka pantun ukai semina seni jaku tang mega kelai pemintar, pengalus budi enggau lanting ti diariska kenyau beratus taun ke udah.
Pantun mega udah dikelala tauka diaku UNESCO nyadi Warisan Budaya Tidak Ketara Dunia, ku iya, tang pemadu beguna kitai empu bisi tanggung pengawa dalam nentuka pantun terus idup dalam pengidup tiap hari raban bansa.
Berindik ari pekara nya iya meransang mayuh agi egansi perintah, kompeni korporat enggau organisasyen ti bukai neladan pekara ti dipejalaika Bintulu Port.
Laban ku iya, nya sebengkah chara dikena mandangka sukung ngagai lanting enggau budaya bansa kitai sekalika nengah seni, jaku, muzik, tanda sereta tradisi raban bansa.
"Kitai enda ulih ngelakka lanting bansa kitai lenyau pia aja, lebih agi dalam dunya moden ti muntang amat enda ingatka penatai asal kitai.
"Nengah inisiatif tu mega, mandangka lanting ukai semina ulih dijaga tang mega ulih diidupka ngena chara kreatif, fresh enggau relevan enggau raban bansa sehari tu.
"Nama ti dikearapka aku, iya nya ngambika asil pengawa tu nyadi pemungkal ngagai lebih mayuh program budaya ti inklusif enggau meri empas positif ngagai komuniti," ku Abdul Karim.
Bisi datai ba pengerami nya Menijar Besai Group Stakeholder Relations ti mega Ketuai Pemesai Eksekutif Yayasan Bintulu Port, Maslihah Tioh enggau sida ke bukai.
– Utusan Borneo